Inauguration Ceremony at Hilton Addis Hotel
August 26, 2021
ሦስት አራተኛው የዓለማችን ክፍል በውኃ የተሸፈነ ስለመሆኑ ይታመናል፡፡ ይህ መረጃ ዓለማችን የውኃ ሀብታም መሆኗን የሚሳይ ነው፡፡ ይሁንና ከዚህ በሽበሽ ውኃ ውስጥ ግን ለመጠጥ አገልግሎት የሚውለው የውኃ መጠን ይለይ ከተባለ ግን አስደንጋጭ ሊባል የሚችል አኃዝ ይታያል፡፡ የዓለም ሦስት አራተኛ ከያዘው ውኃ ውስጥ ለመጠጥ የሚውለው የውኃ መጠን ሦስት በመቶ እንኳን አይሞላም፡፡
ከፍተኛ ውኃ የሚጠቀሙ ኢንዱስትሪዎች ከውኃ እጥረት ጋር በተያያዘ ሊያጋጥሟቸው የሚችሉ ችግሮችን ለመከላከልና በዘርፉ በጋራ ለመሥራት ጥምረት በይፋ መሠረቱ፡፡
ጥምረቱን የመሠረቱት ከፍተኛ ውኃ የሚጠቀሙት የታሸገ ውኃ፣ የለስላሳ መጠጥ፣ የጭማቂ፣ የቢራና የሌሎች የአልኮል መጠጥ ፋብሪካዎች ናቸው፡፡
ሐሙስ ነሐሴ 20 ቀን 2013 ዓ.ም. በይፋ የተመሠረተው ጥምረት፣ በውኃና ወኃ ነክ ምርት ላይ የተሰማሩ ፋብሪካዎች የፋብሪካዎቹ ዋና ጥሬ የሆነውን ውኃ በአግባቡ የመጠቀም አስፈላጊነት ላይ በመግባባት ለዚሁ ጉዳይ የሚሠራ ጥምረት አቋቁመዋል፡፡
የተፈጥሮ ውኃን በአግባቡ መጠቀም አስፈላጊነት ላይ በዓለም አቀፍ ደረጃ የተለያዩ ሥራዎች እየተከናወኑ ነው፡፡ አላቂ ሀብት ነው ተብሎ የሚታመነውን ውኃ በአግባቡና በቁጠባ መጠቀም ካልተቻለ ወደፊት እጥረት ይፈጠራል የሚል ሥጋትም አለ፡፡ ኢትዮጵያ ከፍተኛ የውኃ ሀብት አላት ቢባልም፣ በአግባቡ መጠቀም ካልተቻለ የችግሩ ሰላባ ትሆናለች የሚሉ ምልከታዎች እየተንፀባረቁ ነው፡፡ በከፍተኛ ደረጃ ውኃን ዋነኛ ግብዓት አድርገው የሚጠቀሙ ፋብሪካዎች የውኃ እጥረት የሚያጋጥማቸው ወቅት አለ፡፡ ይህ ጉዳይ ዝም ከተባለና ውኃን ቆጥቦ በመጠቀም በጋራም ሆነ በግል መሥራት ካልተቻለ፣ እ.ኤ.አ. በ2030 የውኃ እጥረት ሊያጋጥም ይችላል የሚል በጥናት ላይ የተመሠረተ ትንታኔ ይቀርባል፡፡
ዛሬ ላይ የከርሰ ምድር ውሃ ለማግኘት 200 ሜትር ድረስ እንደሚቆፈር ተሰምቷል። ይህም ውሃ እየጠፋ እንደሆነ ምልክት ነው ተብሏል። የከርሰ ምድር ውሃ እንዳይባክን በቁጠባና በኃላፊነት ለማሥተዳደር ፖሊሲ ያስፈልጋል ተብሏል።
የታሸገ የውሃ አምራች ድርጅቶች ከአካባቢ ጥበቃ እና ሌሎች ሥራዎች ጋር በተገናኘ አንድ ላይ ለመሥራት መስማማታቸው ተሰምቷል። የታሸገ ውሃ እና የለስላሳ መጠጥ አምራች ድርጅቶች፣ የአትክልትና ፍራፍሬ አቀናባሪ እና ጨማቂዎች፣ እንዲሁም ሌሎችም አንድ ላይ ለመሥራት ሕብረት ፈጥረዋል ተብሏል።
